Chapter 5

  post haec erat dies festus Iudaeorum et ascendit Iesus Hierosolymis  

  est autem Hierosolymis super Probatica piscina quae cognominatur hebraice Bethsaida quinque porticus habens  

  in his iacebat multitudo magna languentium caecorum claudorum aridorum expectantium aquae motum  

  []  

  erat autem quidam homo ibi triginta et octo annos habens in infirmitate sua  

  hunc cum vidisset Iesus iacentem et cognovisset quia multum iam tempus habet dicit ei vis sanus fieri  

  respondit ei languidus Domine hominem non habeo ut cum turbata fuerit aqua mittat me in piscinam dum venio enim ego alius ante me descendit  

  dicit ei Iesus surge tolle grabattum tuum et ambula  

  et statim sanus factus est homo et sustulit grabattum suum et ambulabat erat autem sabbatum in illo die  

  dicebant Iudaei illi qui sanatus fuerat sabbatum est non licet tibi tollere grabattum tuum  

  respondit eis qui me fecit sanum ille mihi dixit tolle grabattum tuum et ambula  

  interrogaverunt ergo eum quis est ille homo qui dixit tibi tolle grabattum tuum et ambula  

  is autem qui sanus fuerat effectus nesciebat quis esset Iesus enim declinavit turba constituta in loco  

  postea invenit eum Iesus in templo et dixit illi ecce sanus factus es iam noli peccare ne deterius tibi aliquid contingat  

  abiit ille homo et nuntiavit Iudaeis quia Iesus esset qui fecit eum sanum  

  propterea persequebantur Iudaei Iesum quia haec faciebat in sabbato  

  Iesus autem respondit eis Pater meus usque modo operatur et ego operor  

  propterea ergo magis quaerebant eum Iudaei interficere quia non solum solvebat sabbatum sed et Patrem suum dicebat Deum aequalem se faciens Deo respondit itaque Iesus et dixit eis  

  amen amen dico vobis non potest Filius a se facere quicquam nisi quod viderit Patrem facientem quaecumque enim ille fecerit haec et Filius similiter facit  

  Pater enim diligit Filium et omnia demonstrat ei quae ipse facit et maiora his demonstrabit ei opera ut vos miremini  

  sicut enim Pater suscitat mortuos et vivificat sic et Filius quos vult vivificat  

  neque enim Pater iudicat quemquam sed iudicium omne dedit Filio  

  ut omnes honorificent Filium sicut honorificant Patrem qui non honorificat Filium non honorificat Patrem qui misit illum  

  amen amen dico vobis quia qui verbum meum audit et credit ei qui misit me habet vitam aeternam et in iudicium non venit sed transit a morte in vitam  

  amen amen dico vobis quia venit hora et nunc est quando mortui audient vocem Filii Dei et qui audierint vivent  

  sicut enim Pater habet vitam in semet ipso sic dedit et Filio vitam habere in semet ipso  

  et potestatem dedit ei et iudicium facere quia Filius hominis est  

  nolite mirari hoc quia venit hora in qua omnes qui in monumentis sunt audient vocem eius  

  et procedent qui bona fecerunt in resurrectionem vitae qui vero mala egerunt in resurrectionem iudicii  

  non possum ego a me ipso facere quicquam sicut audio iudico et iudicium meum iustum est quia non quaero voluntatem meam sed voluntatem eius qui misit me  

  si ego testimonium perhibeo de me testimonium meum non est verum  

  alius est qui testimonium perhibet de me et scio quia verum est testimonium quod perhibet de me  

  vos misistis ad Iohannem et testimonium perhibuit veritati  

  ego autem non ab homine testimonium accipio sed haec dico ut vos salvi sitis  

  ille erat lucerna ardens et lucens vos autem voluistis exultare ad horam in luce eius  

  ego autem habeo testimonium maius Iohanne opera enim quae dedit mihi Pater ut perficiam ea ipsa opera quae ego facio testimonium perhibent de me quia Pater me misit  

  et qui misit me Pater ipse testimonium perhibuit de me neque vocem eius umquam audistis neque speciem eius vidistis  

  et verbum eius non habetis in vobis manens quia quem misit ille huic vos non creditis  

  scrutamini scripturas quia vos putatis in ipsis vitam aeternam habere et illae sunt quae testimonium perhibent de me  

  et non vultis venire ad me ut vitam habeatis  

  claritatem ab hominibus non accipio  

  sed cognovi vos quia dilectionem Dei non habetis in vobis  

  ego veni in nomine Patris mei et non accipitis me si alius venerit in nomine suo illum accipietis  

  quomodo potestis vos credere qui gloriam ab invicem accipitis et gloriam quae a solo est Deo non quaeritis  

  nolite putare quia ego accusaturus sim vos apud Patrem est qui accuset vos Moses in quo vos speratis  

  si enim crederetis Mosi crederetis forsitan et mihi de me enim ille scripsit  

  si autem illius litteris non creditis quomodo meis verbis credetis